1.4. SANKTA UGO DE GRENOBLE
Sinjoro,
Elaŭdu la preĝojn
kiujn ni levas al Vi en la soleno
de via beata konfesanto
kaj pontifiko Ugo
kaj per la propeto
kaj la meritoj de li,
kiu scipovis inde servi al Vi,
absolvu nin de ĉiuj niaj pekoj. Amen.
2.4. SANKTA FRANCISKO DE PAOLA
Ho glorplena nia protektanto Sankta Francisko de Paola,
kiu ekde la tempo kiam vi vivis sur ĉi tiu tero
estis elektita de Dio esti instrumento de lia boneco
kaj ĉiopovo en la farado de mirindaĵoj avantaĝe al tiuj kristanoj
kiuj kun viva fido aliris al viaj preĝoj;
nu! turnu favorkore vian rigardon al la devotuloj
kiuj preĝpetas vian propeton.
Ni plorpetas vin havi kompaton al ni
kaj havigi al ni de Dio la gracojn
kiuj plibone respondas al la spirita bono de nia animo.
Pro tiu ardo de karitato kiu flamigis vian koron,
forigu de ni ĉion, kio nin ĉagrenas.
Faru, ho Patro Sankta, ke super ni triumfu la dia Mizerikordo,
kiu nin konsolu per sava liberigo kaj per rezignacia pacienco;
kaj tiel ambaŭ utilu al ni kiel feliĉa preludo
al la eterna gloro de Paradizo. Amen.
3.4. SANKTA LUIZO SCROSOPPI
Via konfido en la Providenco
esperigas min en la boneco de Dio la Patro
por la graco kiun mi arde deziras.
Helpu min per via propeto
por ke la Sinjoro suprenlevu min
el mia suferado.
Patro Luizo,
la granda karitato kun kiu vi amis
la malriĉulon kaj la suferanton,
vidante en li Jesuon,
Filon de Dio,
min pelas konfidi min
al vis potenca propeto
por atingi de la Sinjoro
la gracon kiun mi arde deziras.
Patro Luizo,
via tuta vivo,
sub la impulso de la Spirito,
estis direktita al la gloro de Dio,
havigu al mi de la Sinjoro,
por Lia gloro,
mildigon kaj konsolon en ĉi tiu suferado,
propetante la gracon kiun mi plorpetas
aŭ tiun kiu estas plej utila por mia vivo. Amen.
4.4. SANKTA IZIDORO EL SEVILO, Episkopo kaj Doktoro de la Eklezio
Ni estas ĉi tie antaŭ Vi, ho Sankta Spirito;
ni sentas la pezon de niaj malfortecoj,
sed ni estas ĉiuj kuniĝintaj en via nomo;
venu al ni, asistu nin, venu en niajn korojn;
instruu al ni kion ni faru,
montru al ni la vojon irendan,
faru Vi mem tion kion ni petas.
Nur Vi sugestu kaj gvidu niajn decidojn,
ĉar nur Vi, kun Dio la Patro kaj kun lia Filo,
havas nomon sanktan kaj glorplenan;
ne permesu ke ni vundu la justecon,
Vi kiu amas la ordon kaj la pacon;
ne misvojigu nin la senscio,
ne igu nin partiecaj la homa simpatio,
ne influu nin oficoj kaj personoj;
tenu nin kunpremitaj al Vi kaj en nenio ni deiĝu de la vero;
faru ke kuniĝintaj en via sankta nomo,
ni scipovu samtempe kunmeti bonecon kaj firmecon,
tiel ke ni faru ĉion en harmonio kun vi,
en la atendo ke pro la fidela plenumo de nia devo
estu al ni donitaj estonte la eternaj bonaĵoj. Amen.
5.4. KRONPREĜO AL SANKTA VINCENTO FERRER
- Glorplena Vincento Ferrer, mi preĝas al vi, pro la Donaco de Saĝo kiun vi havis de la Sankta Spirito, havigu al mi la gracon saviĝi. Gloro al la Patro…..
- Glorplena Vincento Ferrer, mi preĝas al vi, pro la Donaco de Intelekto kiun vi havis de la Sankta Spirito, havigu al mi la gracon kompreni la inspirojn kiuj al mi venas de Dio. Gloro al la Patro…..
- Glorplena Vincento Ferrer, mi preĝas al vi, pro la Donaco de Prudento kiun vi havis de la Sankta Spirito, havigu al mi la gracon iradi laŭ evangelia prudento. Gloro al la Patro…..
- Glorplena Vincento Ferrer, mi preĝas al vi, pro la Donaco de Sciado kiun vi havis de la Sankta Spirito, havigu al mi la gracon esti forta kontraŭ miaj spiritaj malamikoj kaj elteni pacience la malfacilaĵojn de la vivo. Gloro al la Patro…..
- Glorplena Vincento Ferrer, mi preĝas al vi, pro la Donaco de Sciado kiun vi havis de la Sankta Spirito, havigu al mi la gracon koni kaj utiligi la realaĵojn de la mondo ĉiam metante Dion je la unua loko. Gloro al la Patro…..
6.4. BEATA MICHELE RUA
Ho kara kaj bona Jesuo, nia tre aminda Elaĉetanto kaj Savanto,
kiu je la flanko de la granda apostolo de la junularo de la novaj tempoj
metis Vian fidelegan Servanton pastron Michele Rua
kaj inspiris al li, ekde la junaĝo, la intencon pristudi liajn ekzemplojn,
dignu premii lian mirindan fidelecon,
rapidigante la tagon en kiu li kundividos
kun don Bosco ankaŭ la gloron de la altaroj. Amen.
7.4. SANKTA JOHANO BAPTISTO DE LA SALLE
Preĝo de la edukisto
Mi Vin dankas, Sinjoro, ĉar Vi donis al mi la ĝermon de la fido,
ĉar Vi ekbruligis en mia koro la sanktan fajron de via amo,
ĉar Vi havigis al mi privilegion, vokante min plenumi
la mision de edukisto (en la lasalana lernejo).
Mia respondo al via voko estis totala, senkondiĉa,
kvankam ne sen duboj kaj malfacilaĵoj.
Mia eduka respondeco, vera krizostata demando de niaj tagoj,
estas granda, samkiel grandaj estas la donacoj kiujn Vi,
Sinjoro, donacas al la sindonemaj animoj,
kiuj elektis sekvi viajn vojojn!
Donu al mi la kuraĝon, la kreemon, la entuziasmon,
la spiriton de fido, la donacon konverti la korojn,
kiujn havis Sankta Johano Baptisto de La Salle,
nia modelo de edukisto kaj ĉiela protektanto.
Sinjoro, mi portos Vin en mia mansako kiel panpecon.
Mi portos Vin en miaj silentoj, kiam vekiĝas la sonĝoj.
Mi portos Vin en mia vojirado kaj en la manoj kiujn mi premas.
Via nomo estos ĉiam sur mia buŝo.
Mi petas vian pardonon, ho Dio, ĉar ne ĉiam mi kapablis transdoni
al miaj lernantoj la entuziasmon por la esploro.
Mi petas Vin, redonu al mi entuziasmon por la esploro,
por instrui al mi mem kaj al miaj lernantoj
la komprenon de la nova mondo
kaj la kapablon scipovi vivi en ĝi respondece.
Helpu min mediti kun la knaboj pri la problemoj de l’ mondo,
tiel ke la meditado ne estu disigita de la agada respondeco.
Donu al mi la forton por scipovi kuraĝigi aŭ korekti,
por ke mi ne serĉu la facilan aplaŭdon
sed la veran estimon al mia laboro,
kiu daŭras preter la tempo kaj la jaroj.
Vi kiu estas la Majstro, utiligu min por formi la infanojn,
kiujn la familioj, la socio kaj la lernejo konfidis al mi.
Dankon pro la helpo, kiun Vi ne mankigos al mi. Amen.
8.4. SANKTA JULIA BILLIART, virgulino
Ho Sankta Julia,
pro via granda devoteco
al la Sankta Koro de Jesuo
vi estis mirakle kuracita
kaj favorita per multaj gracoj.
Per via potenca propeto,
enverŝu en nin senliman fidon je Dio
en la malfacilaĵoj de la vivo,
kaj la forton plenumi en ĉio
Lian Volon
kaj la specialan gracon
kiun ni arde preĝpetas….
Sankta Julia Billiart, preĝu por ni! Amen.
9.4. SANKTA DEMETRIO EL TESALONIKO
Sankta Demetrio manifestu la fidon je Kristo
kaj instruu ankaŭ nin
pri la misteroj de la kristana kredo.
Helpu nin ne akcepti ian ajn konspiron
kiu igu nin malkonfesi nian kredon,
prefere trasuferi la martirigon
pro amo al la Sinjoro. Amen.
10.4. SANKTA GEMMA
(Preĝo de Johano Paŭlo la 2-a)
Ho Patro, kiu havas plezuron ekloĝi en tiuj kiuj amas Vin kun koro simpla kaj pura, faru ke laŭ la ekzemplo kaj per la propeto de S-ta Gemma ni travivu, kun evangelia pureco, la misteron de la krucumita amo, por esti vivanta bildo via Filo.
Li estas Dio kaj vivas kaj regnas kun Vi, en la unueco de la Sankta Spirito dum ĉiuj jarcentoj da jarcentoj. Amen.
11.4. SANKTA STANISLAO, episkopo kaj martiro
Sankta Stanislao Episkopo kaj Martiro,
defendanto de la kristana socio kaj de ĝiaj valoroj,
helpu nin en la maljustaĵoj de ĉi tiu tempo.
Regu kiel bona paŝtisto nian Eklezion,
helpu la malriĉulojn ne perdi la esperon,
kaj gardi vivanta sian kristanan fidon.
Vizitu niajn sacerdotojn,
donacu al ili saĝon kaj virton,
kaj sugestu al ili
instrui la plej malmolajn fidelulojn
kun amo kaj pacienco,
trakti ĉiujn kun la dolĉeco
kaj la boneco de Patro
kaj kiel Vi estas Johano la Baptisto,
ne havi timon
riproĉi tiujn, kiuj regas nin. Amen.
12.4. SANKTA ZENO (ZENONO) EL VERONO
Sinjoro benata, ĉio
– ĉielo, maro kaj tero –
estas laŭ via bontrovo,
gracon ni petas de Vi
surgenue kun kunmetitaj manoj.
Bonvolu, ni Vin petas, aŭskulti ĉi tiun preĝon
de ni kompatinduloj,
kiun ni faras al Vi el animo kaj koro
kiel povas ĝin fari fiŝkaptisto. Amen.
13.4. BEATA ROLANDO RIVI
Ho Dio, mizerikorda Patro,
kiu elektas la malgrandulojn por hontigi la potenculojn de l’ mondo,
mi Vin dankas ĉar Vi donacis al ni, en seminariano Rolando Rivi,
ateston pri tuteca amo al Via Filo Jesuo kaj al Lia Eklezio,
ĝis la forofero de la vivo.
Prilumita de ĉi tiu ekzemplo kaj per la propeto de Rolando,
mi Vin petas doni al mi la forton esti ĉiam
vivanta signo de Via amo en la mondo
kaj mi preĝpetas Vin ke Vi bonvolu konsenti al mi la gracon…
kiun mi arde deziras. Amen.
14.4. SANKTA LIDVINA EL SCHIEDAM
Sankta Lidvina, per viaj suferoj vi bone konis la pezon de la kruco.
Bonvolu preĝi por ĉiuj prematoj en la vivo.
Instruu al ni per via ekzemplo neniam malŝpari unu guton da doloro,
sed kun amo kaj kun kuraĝo, helpu nin oferi ilin al nia Sinjoro,
kiu pacience suferis por ni. Amen.
15.4. BEATA CEZARO DE BUS
Ho Dio, ni Vin dankas ĉar Vi donis al via Eklezio la beatan Cezaron. Vi estis por li mizerikorda Patro, faru ke lia sankteco estu rekonata de Eklezio.
Ho Jesuo, vivanta Vorto de la Patro, anoncita de beata Cezaro al la etuloj kaj al la malriĉuloj, konsentu al tiuj kiuj malsatas kaj soifas je la Dia Vorto respektegi lin baldaŭ kiel Sanktulon.
Ho Sankta Spirito, kiu gvidis beatan Cezaron al la sankteco kaj inspiris lin fondi Kongregacion por la instruado de la Kristana Doktrino, faru ke li estu proponata kiel ekzemplo al la katekizistoj.
Ho Maria, Patrino de Dio kaj de la Eklezio, Reĝino de la Sanktuloj, aklamata ”Beata ĉar vi kredis je la Vorto”, al vi ni fidoplene konfidas nian preĝon. Amen.
16.4. SANKTA BERNADETA SOUBIROUS
Kara Sankta Bernadeta, elektita de Dio Ĉiopova kiel kanalo de liaj gracoj kaj benoj, per via humila obeo al la petoj de Nia Patrino Maria, vi gajnis por ni la miraklajn akvojn de la spirita kaj korpa sanigo.
Ni petegas vin, aŭskultu niajn plorpreĝojn, por ke ni povu esti sanigataj el niaj spiritaj kaj korpaj malperfektaĵoj.
Metu niajn petegojn en la manojn de nia Sankta Patrino Maria, por ke ŝi povu ilin meti ĉe la piedojn de sia amata Filo, nia Sinjoro kaj Savanto Jesuo Kristo, por ke Li povu rigardi al ni kun mizerikordo kaj kompato (oni eldiru la gracon, kiun oni petas)
Helpu nin, ho kara Sankta Bernadeta, sekvi vian ekzemplon, tiel ke, senkonsidere pri nia doloro kaj pri nia sufero, ni povu esti atentaj al la bezonoj de la aliaj, precipe de tiuj, kies suferoj estss pli grandaj ol la niaj.
Dum ni atendas la Mizerikordon de Dio, ni oferas nian doloron kaj nian suferon por la konvertiĝo de la pekuloj kaj por riparo de la pekoj kaj de la blasfemoj de la homoj.
Preĝu por ni Sankta Bernadeta, por ke, samkiel vi, ni povu esti ĉiam obeemaj al la volo de nia ĉiela Patro, kaj pere de niaj preĝoj kaj nia humileco ni povu havigi konsolon al la Sanktega Koro de Jesuo kaj al la Senmakula Koro de Maria, kiuj estis tiel serioze vunditaj de niaj pekoj.
Sankta Bernadeta, preĝu por ni!
17.4. BEATA KLARA GAMBACONTI
Ho Beata Klara Gambacorti, gloro de la Dominikana Ordeno kaj de la urbo Pizo kie brilegis via heroa sankteco, preĝu por ni, por ke viaj mirindaj, mistikaj spertoj en la spirito de Sankta Katarina el Sieno, estu por ni bonefika stimulo atingi, samkiel Vi, nian lastan celon, kiu estas Dio, adorinda kaj admirinda en siaj Sanktuloj. Beataj tiuj, kiuj vivas en la kontemplado de la ĉielaj veroj de la fido, por sia savo kaj por tiu de la aliaj. Amen.
18.4. SANKTA GALDINO EPISKOPO
Ho Dio, kiu prilumas la Eklezion
per la ekzemplo de viaj sanktuloj,
faru ke la evangelia atesto
de sankta Galdino
nin revoku al vivo
pli inda kaj sindonema
kaj la memoro pri liaj faroj
stimulu nin ĉiam al la imito
de via Filo. Amen.
19.4. SANKTA EMMA EL SAKSUJO
Ho Dio,
kiu hodiaŭ ĝojigas nin per la festo
de sankta Emma,
faru ke la memoro
pri ŝia evangelia atesto
marku renovigon
de nia vivo. Amen.
20.4. BEATA KLARA BOSATTA
Sinjoro nia Dio,
kiu faris el Beata Klara Bosatta,
vivantan bildon de via Filo Jesuo,
adoranto de la Patro kaj humila Servanto de la homoj,
ni preĝas al Vi, ke ankaŭ ni povu sekvi lian ekzemplon
kaj ricevi per lia propeto la gracon….
kiun fidoplene ni petas de Vi.
Per Kristo nia Sinjoro. Amen.
21.4. SANKTA KONRADO EL PARZHAM
Ho Sinjoro kiu volis malfermita al la fideluloj
la pordon de via mizerikordo,
ni plorpetas Vin, ke,
per propeto de Sankta Konrado,
Vi konsentu al ni la helpojn por niaj bezonoj,
surteraj kaj eternaj. Amen.
*
Ho glorplena Sankta Konrado,
havigu al ni de Dio grandan amon
al la virtoj de karitato,
de humilo kaj de pacienco,
por ke per ilia praktikado
ankaŭ ni povu ĝisatingi tiun sanktecon,
kiun Dio atendas de ni. Amen.
22.4. SANKTA LEONIDO, martiro, patro de Origeno
Ho elstara Sankta Leonido,
ni fordoniĝas al viaj zorgoj,
eduku nin al la studo de la Sankta Skribo
poste al tiu de literaturo,
kiel vi edukis vian filon Origenon.
Ni dankas Dion
pro la postlaso kiel atesto
de via filo, kie haltis lia mano.
Helpu ankaŭ nin esti
sanktejo de la Sankta Spirito,
tiel ke ni povu kiel li
disvastigi filozofie la evangelion,
transdonante al aliaj lian instruon
de Patro de la Eklezio.
Plue ni vin dankas kaj preĝpetas,
igi nin fortikaj en la kristana fido,
admonante nin akcepti kun amo al Kristo
la martirigon, antaŭ ol ĝin fornei.
Sankta Leonido propetu por ni ĉe Jesuo. Amen.
23.4. SANKTA GEORGO
Ho Sankta Georgo, al vi mi min turnas
por peti vian protekton.
Memoru pri mi, vi kiu ĉiam helpis
kaj konsolis ĉiujn kiuj al vi vokis
en siaj bezonoj.
Animita de granda konfidenco
kaj de la certeco ne preĝi sencele,
mi aliras al vi kiu estas tiel riĉa je meritoj
antaŭ la Sinjoro: faru ke mia preĝpeto
atingu, per via propeto,
la Patron de mizerikordo.
Benu mian laboron kaj mian familion;
tenu for la danĝerojn de la animo kaj de la korpo.
Kaj faru ke, en la horo de la doloro kaj de la provo,
mi povu resti forta en la fido
kaj en la amo al Dio. Amen.
24.4. SANKTA BENEDETTO MENNI
Ho Dio, konsolo kaj subteno de la humiluloj,
Vi igis Sanktan Benedikton Menni, pastron,
heroldo de via Evangelio de mizerikordo,
per la instruo kaj per la faroj.
Konsentu al ni, per lia propeto,
la gracon kiun nun ni petas de Vi,
sekvi liajn ekzemplojn kaj ami Vin super ĉio,
por esti pelataj servi al Vi en niaj gefratoj
malsanaj kaj bezonhavaj.
Per Kristo Nia Sinjoro. Amen.
25.4. SANKTA MARKO, evangeliisto
Ho Glorplena sankta Marko, kiu estis ĉiam tre speciale honorata de la Eklezio, ne nur pro la popoloj de vi sanktigitaj, pro la Evangelio de vi verkita, pro la virtoj de vi praktikitaj, kaj pro la martirigo de vi trasuferita, sed ankaŭ pro la speciala zorgo, kiun Dio montris al via korpo mirakle savita jen el la flamoj al kiuj ĝin destinis la idolanoj en la tago mem de via morto, jen el la malsanktigo de la saracenoj fariĝintaj mastroj de via tombo en Aleksandrio, faru ke ni povu imiti viajn virtojn. Amen.
26.4. SANKTA RAFAELO ARNAIZ BARON
Ho Dio, kiu igis el Sankta Rafaelo Arnaiz luman disĉiplon en la sciado de la Kruco de Kristo, faru ke, per lia ekzemplo kaj lia propeto, ni amu Vin super ĉio, kaj sekvante la vojon de la Kruco kun la koro plivastigita, ni ĝisatingu partopreni la paskan ĝojon. Per nia Sinjoro Jesuo Kristo. Amen.
27.4. BEATA GIACOMO DE BITETTO (de Zadar)
Ho Bona Patro, fonto de amo,
kiu demetis vian teneran rigardon sur la humilan Beatan Giacomo,
ni preĝas al Vi, ke Vi donu al ni la ĝojon vidi lin rekonata inter la kredindaj atestantoj,
respektegendaj kaj imitendaj en la universala Eklezio, mistika korpo de Kristo.
Li, kiu kiel fidela filo de Sankta Francisko de Asizo,
scipovis sindoni fortike favore al la malriĉuloj kaj al la suferantoj,
instigu nin levi la rigardon por esplori la mirindaĵojn de Dio,
kiuj reflektiĝas en la gefratojn kaj en la kreitaron.
Al lia propeto ni konfidas niajn intencojn,
certaj ricevi la gracojn, kiujn ni petegas.
Per Kristo nia Sinjoro. Amen.
28.4. PREĜO EL LA SKRIBAJXJ DE GIANNA BERETTA MOLLA (16-an de februaro 1946)
Jesuo, jen mi.
Jesuo, eniru, restu ĉiam kun mi.
Mi tre bezonas ke Vi prilumu min,
ke Vi igu min plibona.
Donu al mi vian gracon,
ekfajrigu min per via Amo. Amen.
29.4. SANKTA KATARINA DE SIENO (Preĝo de Pio la 12-a)
Ho sankta Katarina, lilio de virgeco kaj rozo de karitato kiu ornamis la dominikanan ĝardenon, heroino de kristana fervoro kiu estis elektita samkiel Francisko speciala Patronino de Italio, al vi ni fidemaj aliras, alvokante vian potencan protekton sur nin kaj sur la tutan Eklezion de Kristo, via amata, je kies koro vi trinkis neelĉerpebla fonto de ĉiu graco kaj de ĉiu paco por vi kaj por la mondo.
De tiu dia koro vi devenigis la vivan akvon de virto kaj de konkordo en la familioj, de honesta sinteno en la junularo, de kuniĝo inter la malkonkordaj popoloj, de renovigo de la publikaj moroj kaj de la frata amo, kompatema kaj bonfara al la malfeliĉuloj kaj al la suferantoj, kaj vi instruis per via ekzemplo kunigi la unuiĝon kun Kristo kun la amo al la patrolando. Se vi amas Italion kaj la popolon al vi konfiditan, se la kompato al ni vin movas, se al vi estas kara la tombo en kiu Romo respektegas kaj honoras viajn virgajn restaĵojn, tiam, turnu indulgema vian rigardon kaj vian korfavoron al nia peno kaj al nia preĝo kaj plenumu niajn petdezirojn.
Defendu, sukuru kaj konsolu vian patrolandon kaj la mondon. Sub via ŝirmo kaj protekto estu la filoj kaj la filinoj de Italio, niaj koroj kaj niaj animoj, niaj klopodoj kaj niaj esperoj, nia fido kaj nia amo: tiu amo kaj tiu fido kiuj estis via vivo kaj igis vin bildo de Kristo krucumita en la sentima fervoro por lia edzino, la sankta Eklezio.
Ho heroeca kaj sankta heroldino de unueco kaj de paco por la Eklezio de Kristo, kiu redonas al la roma apostola sidejo en ĝia brilego de aŭtoritateco kaj instrupovo la Posteulon de Petro, protektu kaj konsolu lin en lia patra universala zorgemo, en liaj afliktoj kaj en liaj konsiloj por la savo kaj la paco de la popolo; kaj revigligu, konservu kaj kreskigu en ni kaj en ĉiuj kristanaj fideluloj, ho ĉiela Patronino, la amemon kaj la obeemon kiun vi havis al li kaj al ŝafejo de Kristo, en la trankvileco de la mondo. Amen.
30.4. SANKTA JOZEFO COTTOLENGO
Preĝkroneto verkita de Sankta Jozefo Cottolengo (oni trapreĝas ĝin laŭ la Rozaria krono)
– Ho Dio, venu savi min…
– Sinjoro, venu baldaŭ je mia helpo.
– Gloro al la Patro…
Ĉe la malgrandaj bidoj:
– Virgulino Maria, Patrino de Jesuo, igu nin sanktaj.
Ĉe la grandaj bidoj:
– Gloro al la Patro…
Ĉe la fino:
– Estu farata, laŭdata kaj eterne ekzaltata la justega, plejalta kaj tre aminda volo de Dio en ĉiuj aferoj.
– Saluton, Reĝino…
