68-a de IKUE 65-a de KELI
1.-8.8.2015, Strasburgo, Francio
Temo “Donu al mi trinki” (Joh 4,7), “La malsameco pririĉigas min”
Strasburgo (franclingve Strasbourg, alzac-lingve Strossburi kaj germanlingve Strassburg) estas la ĉefurbo de la departamento Malalta Rej-no en la regiono Alzaco, plej oriente de Francio. En Strasburgo loĝas ĉirkaŭ 272000 loĝantoj. Krom francoj tie loĝas ankaŭ germanoj, araboj, judoj, azianoj kaj afrikanoj. Strasburgo estas urbo malfermita kaj kosmopolita, kie katolikoj kaj protestantoj vivas harmonie. En parto de la insulo de rivero Ill situas impona gotikstila Katedralo Notre Dame – Nia Sinjorino, kiu estis konstruata dum la jaroj 1176-1439 kun ĝia pinaklo alta 142 m. Ĉi-jare la katedralo festas 1000 jarojn ekde la fondiĝo. Ĝi estas ornamita per amaso da statuoj, astronomia horloĝo kaj belaj vitraloj. La krono de 12 steloj sur la kapo de Virgulino Maria en la vitralo super la ĉefa altaro estis inspiro por Robert Schumann por la flago de Eŭropa Unio.
La temo de la kongreso estis “Donu al mi trinki” (Joh 4,7), “La malsameco pliriĉigas min”. Temas pri la renkontiĝo de Jesuo kun samarianino ĉe la puto.
Ĉiutage okazis sanktaj mesoj en proksima kapelo kaj komunaj matenaj kaj vesperaj preĝoj kaj kantoj en la kongresejo.
Okazis prelegoj ne nur pri la kongresa temo. Ekzemple ĉina kristano Zhang Fude rakontis pri la vivo de kristanoj en Ĉinio. Lia avino estis malliberigita en ĉina koncentrejo milojn da kilo-metroj de sia hejmo dum 20 jaroj nur pro tio, ke ŝi estis kristanino. Sed dank’ al sia forta kredo ŝi transvivis eĉ tiel longan malliberon kaj revenis hejmen. Teologoj Gerrit Berveling, Gerard Siegwalt kaj Emmanuel Wald prelegis pri diversaj tradukoj de la Sankta Biblio.
Ni vizitis diversajn preĝejojn en la urbo (romkatolikan, evangelianan, metodistan, ortodoksan, judan). En la metodista preĝejo ni trarigardis biblian ekspozicion. Tie estis ne nur faksimilo de paĝo de la plej malnova franca Biblio el la 14-a jarcento, sed ankaŭ granda kolekto de Biblioj en diversaj lingvoj. Ni trovis la Bibliojn en hungara kaj ĉeĥaj lingvoj, la Biblion presitan en Brajlo; kompreneble ne mankis la Sankta Biblio en Esperanto.
En la tuttaga ekskurso ni vizitis alzacan regionon, urbeton Obernai, kiu kun siaj lignokradaj, belegaj dometoj aspektas kiel fabela urbo. Ni admiris tie la romkatolikan gotikan preĝejon, la Sinagogon kaj la muregojn de la iama fortikaĵo.
Poste sur Monto Sankta Odilia ni vizitis la monaĥejon, rigardis la preĝejon kaj kapelojn konstruitajn en bela natura ĉirkaŭaĵo. De sur la montopinto ni povis vidi la landon eĉ ĝis la germana Nigra Arbaro (Schwarzwald). Sankta Odi-lia de Alzaco (662-720) estas patronino de bona vido kaj Alzaco. En vilaĝo Gertwiller ni vizitis la fabrikon kaj muzeon de mielkuko.
La vizito en la Eŭropa Parlamento, grandioza konstruaĵo, kie laboras niaj deputitoj, estis tre interesa. Se reprezentantoj de 28 membro-ŝtatoj de Eŭropa Unio parolas 24 lingvojn, ili bezonas 1800 tradukistojn. Kelkaj el ni fajre diskutis kun franca ĉiĉeronino pri la ebla rolo de Esperanto en la Eŭropa Parlamento. La ĉiĉeronino klarigis, ke la deputitoj jam estas tiel alkutimitaj paroli la anglan, francan kaj germanan, ke oni ne bezonas solvi lingvajn problemojn. La Parlamento provizore funkcias sen Esperanto. Oni ankaŭ vizitis la duan plej grandan sinagogon en Eŭropo, kiu nomiĝas Sinagogo de la Paco. (EK, 7-9/2015)
