MESAĜO DE LA PAPO POR
KRISTNASKO 2002
1. "Hodiaŭ infano naskiĝis al ni, filo estas donita al ni" (Jes 9,5). Renoviĝas hodiaŭ la mistero de Kristnasko: naskiĝas ankaŭ por la homoj de nia epoko ĉi tiu Infano kiu alportas al la mondo la savon; Li naskiĝas alportante ĝojon kaj pacon por ĉiuj. Ni alproksimiĝas al la kripo kortuŝitaj, por renkonti, kune kun Maria, Tiun, kiun atendis la popoloj, la Elaĉetanton de la homo. Cum Maria contemplemur Christi vultum. Kun Maria ni kontemplas la vizaĝon de Kristo: en tiu Infano kiun oni ĉirkaŭvindis kaj kuŝigis en staltrogon (kp Luk 2,7), estas Dio kiu venas viziti nin por gvidi niajn piedojn en la vojojn de paco (kp Luk 1,79). Maria kontemplas, karesas kaj varmigas Lin, pridemandante sin pri la signifo de la mirindaĵoj, kiuj ĉirkaŭas la misteron de Kristnasko.
2. Mistero de ĝojo estas Kristnasko! La anĝeloj kantis dum la nokto: "Gloro al Dio en la supera alto, kaj sur la tero paco, inter homoj de lia favoro" (Luk 2,14). Ili priskribis al la paŝtistoj la eventon kiel "grandan ĝojon por la tuta popolo" (Luk 2,10). Ĝojo, malgraŭ la malproksimeco disde la hejmo, la malriĉeco en la staltrogo, la indiferenteco de la popolo, la malamikeco de la povo. Mistero de ĝojo, malgraŭ ĉio, ĉar en la urbo de Davido "hodiaŭ estas naskita Savanto" (Luk 2,11). En la sama ĝojo partoprenas la Eklezio, trapenetrata hodiaŭ de la lumo de la Filo de Dio: la tenebroj neniam povos malheligi ĝin. Ĝi estas la gloro de la Eterna Vorto, Kiu fariĝis unu el ni pro amo.
3. Mistero de amo estas Kristnasko! Amo de la Patro, kiu sendis en la mondon sian ununaskitan Filon, por donaci al ni sian vivon mem (kp 1Joh 4,8-9). Amo de la "Dio-kun-ni", la Emanuelo, veninta sur la teron por morti sur la Kruco. En la malvarma kabano, volvita de silento, la Virgulino Maria, kun la koro antaŭsentema, gustumas jam la sangan dramon de Kalvario. Ĝi estos renversiga lukto inter la tenebroj kaj la lumo, inter la morto kaj la vivo, inter la malamo kaj la amo. La Princo de la paco, naskita hodiaŭ en Betlehemo, fordonos sian vivon sur Golgoto por ke regu sur la tero la amo.
4. Mistero de paco estas Kristnasko! El la groto de Betlehemo leviĝas hodiaŭ premanta alvoko por ke la mondo ne cedu je indiferenteco, je suspekto, je malkonfido, kvankam la tragika fenomeno terorismo plikreskigas necertecojn kaj timojn. La kredantoj de ĉiuj religioj, kune kun la bonavolaj homoj, forigante ĉiun formon de netoleremo kaj diskriminacio, estas vokataj konstrui la pacon: en la Sankta Lando, antaŭ ĉio, por haltigi finfine la senutilan spiralon de blinda perforto, kaj en Mezoriento, por estingi la malbonsignan ekbrilon de konflikto, kiun, per ĉies sindevigo, estas evitebla; en Afriko, poste, kie detruantaj karestioj kaj tragikaj internaj luktoj pligravigas la jam malstabilajn situaciojn de tutaj popoloj, kvankam ne mankas ekaperoj de optimismo; en Latinameriko, en Azio, en aliaj mondopartoj, kie politikaj, ekonomiaj kaj socialaj krizoj malkvietigas la trankvilon de ne malmultaj familioj kaj nacioj. Ke la homaro akceptu la mesaĝon de paco de Kristnasko!
5. Adorinda mistero de la Enkarniĝinta Vorto! Kune kun Vi, ho Virgulino Maria, ni haltas meditantaj fronte al la staltrogo en kiu kuŝas la Infano, por kundividi vian saman miron fronte al la senfina indulgemo de Dio. Donu al ni viajn okulojn, ho Maria, por deĉifri la misteron malantaŭ la malfortaj membroj de la Filo. Instruu al ni rekoni lian vizaĝon en la infanoj de ĉiuj rasoj kaj kulturoj. Helpu nin esti kredindaj atestantoj de lia mesaĝo de paco kaj de amo, por ke ankaŭ la viroj kaj virinoj de ĉi tiu nia epoko, daŭre markita de fortaj kontrastoj kaj senprecedencaj perfortaĵoj, kapablu agnoski en la Infano, kiu estas en viaj brakoj, la unikan Savanton de la mondo, neelĉerpeblan fonton de la vera paco al kiu, profunde, sopiras ĉiu koro".
Post la kristnaska mesaĝo la Papo aldiris siajn bondezirojn en 62 lingvoj. En la itala Johano Paŭlo la 2a, pensante al la noblaj kristanaj tradicioj, pri kiuj prave Italio fieras, petdeziris ke "Kristnasko alportu al la kara itala popolo trankvilon kaj pacon: "dum ĉi tiu epoko markita de necertecoj kaj zorgoj, neniam manku espero kaj solidareco, nemalhaveblaj kondiĉoj por konstrui nacian komunumon pli kaj pli fratan. Ke Italio daŭre estu lando unuigita dum la ĝojo kaj la elprovo, ĉiam konfidante je la helpo de Dio".
Ankaŭ en
la pola lingvo la bondeziro de la Papo entenis specialan petdeziron por
tuta nacio: "mi petdeziras ke la mesaĝo de amo kaj mizerikordo,
transdonita al la homoj de la naskiĝo de la Filo de Dio, fariĝu fonto de
renoviĝo en la Patrujo, en la polaj familioj kaj en la persona vivo de
ĉiu el vi. La Dia infano plenigu viajn korojn per la donacoj de la Paco
kaj de la konfido". |
|
|