PRAKTIKA KOMPENDIO DE LA ĈEĤA IKUE-SEKCIO
01 La krucosigno
02 Preĝo de nia Sinjoro
03 La anĝela saluto
04 Ekkanto de gloro
05 La apostola kredsimbolo
06 Saluton, Reĝino
07 Beno
08 Sub vian ŝirmon
09 Ripozon eternan
10 Antaŭ manĝo
11 Post la manĝo
12 Preĝo al Gard-Anĝelo
13 Preĝo al Ĉefanĝelo Miĥaelo
14 Matena preĝo
15 Vespera preĝo
16 Sinkonsekro de la esperantistoj al V. Maria
17 Konsekro al la Senmakula Koro de V. Maria
18 La beno
19 La Anĝeluso
20 Preĝo de Sankta Bernardo
21 Por la Papo
22 Por la paco kaj justeco
01 La krucosigno
En la nomo de la Patro kaj de la Filo kaj de la Sankta Spirito. Amen.
(al la idekso)
02 Preĝo de nia Sinjoro
Patro nia, kiu estas en la ĉielo, sanktigata estu via nomo. Venu via regno.
Fariĝu via volo kiel en la ĉielo, tiel ankaŭ sur la tero. Nian panon
ĉiutagan donu al ni hodiaŭ kaj pardonu al ni niajn ŝuldojn, kiel ankaŭ ni
pardonas al niaj ŝuldantoj. Kaj ne konduku nin en tenton, sed liberigu nin
de la malbono. Amen.
(al la idekso)
03 La anĝela saluto
Saluton, Maria, gracoplena, la Sinjoro estas kun Vi. Benata Vi estas inter
la virinoj kaj benata estas la frukto de via sino, Jesuo. Sankta Maria,
Dipatrino, preĝu por ni pekuloj nun kaj en la horo de nia morto. Amen.
(al la idekso)
04 Ekkanto de gloro
Gloro al la Patro kaj al la Filo kaj al la Sankta Spirito, kiel estis en la
komenco, tiel nun kaj ĉiam, kaj en eterno. Amen.
(al la idekso)
05 La apostola kredsimbolo
Mi kredas je Dio, la Patro ĉiopova, la Kreinto de la ĉielo kaj de la tero;
kaj je Jesuo Kristo, lia ununura Filo, nia Sinjoro, koncipita per la Sankta
Spirito, naskita el Maria la Virgulino, suferinta sub Poncio Pilato,
krucumita, mortinta kaj entombigita, sobirinta en la regnon de la morto. La
trian tagon Li releviĝis el la mortintoj, supreniris al la ĉielo, sidas
dekstre de Dio, la Patro ĉiopova, de kie Li venos, por juĝi la vivantojn kaj
la mortintojn. Mi kredas je la Sankta Spirito, la sankta katolika Eklezio,
la komuno de la sanktuloj, la pardono de la pekoj, la releviĝo de la
mortintoj, kaj la vivo eterna. Amen.
(al la idekso)
06 Saluton, Reĝino
Saluton, Reĝino, kompatema Patrino; nia vivo, nia ĝojo kaj nia espero,
saluton! Al Vi ni vokas, ekzilitaj filoj de Eva. Vin ni petegas, ĝemante kaj
plorante en ĉi tiu valo de larmoj. Pro tio do, nia Perantino, rigardu al ni
per viaj tiel kompataj okuloj. Kaj montru al ni post ĉi tiu ekzilo Jesuon,
la benatan frukton de via sino. Ho milda, ho pia, ho dolĉa Virgulino Maria.
Preĝu por ni, Sankta Dipatrino, por ke ni meritu la promesojn de Kristo.
Amen.
(al la idekso)
07 Beno
Benu kaj gardu nin la ĉiopova kaj kompatema Dio la Patro kaj la Filo kaj la
Sankta Spirito. Amen.
(al la idekso)
08 Sub vian ŝirmon
Sub vian ŝirmon ni rifuĝas, sankta Dipatrino. Ne rifuzu niajn preĝojn
elmizerajn, sed de ĉiuj danĝeroj nin ĉiam liberigu, Virgulino glorinda kaj
benata. Ho Sinjorino nia, Pledantino nia, Perantino nia, Konsolantino nia.
Kun via Filo nin repacigu, al via Filo nin rekomendu, al via Filo nin
redonu. Amen.
(al la idekso)
09 Ripozon eternan
Ripozon eternan donu al ili, Sinjoro, kaj la senfina lumo lumu al ili. Ili
ripozu en la paco. Amen.
(al la idekso)
10 Antaŭ manĝo
Ĉiopova Dio, bonvole benu nin kaj ĉi tiujn bonaĵojn, kiujn ni ricevas de via
boneco, kaj helpu al ni dividi ilin kun la nehavantaj. Per Kristo, nia
Sinjoro. Amen.
(al la idekso)
11 Post la manĝo
Ĉiopova Dio, ni dankas al Vi pro ĉiuj viaj donacoj, kiujn ni ricevis de via
boneco. Per Kristo, nia Sinjoro. Amen.
(al la idekso)
12 Preĝo al Gard-Anĝelo
Anĝelo de Dio, kiu estas mia gardanto, al kiu la Dia boneco min konfidis,
lumigu kaj gardu min dum la tuta vivo kaj precipe en la horo de mia morto.
Amen.
(al la idekso)
13 Preĝo al Ĉefanĝelo Miĥaelo
Sankta Ĉefanĝelo Miĥaelo, defendu nin en batalo. Ŝirmu nin kontraŭ malico
kaj insidoj de diablo. Dio ordonu al li, humile ni petas; kaj vi, princo de
la ĉiela armeo, ĵetu satanon kaj la ceterajn malbonajn spiritojn, kiuj
trairadas la mondon por pereigi animojn, per Dia potenco en la inferabismon.
Amen.
(al la idekso)
14 Matena preĝo
Mia Sinjoro kaj mia Dio, mi ekgenuas antaŭ Vi kaj adoras vian plej superan
Majeston. Mi dankas Vin pro ĉiuj bonfaroj, precipe ke Vi gardis min dum ĉi
tiu nokto. Mi dediĉas al Vi mian animon kaj mian korpon kaj ĉion, kion mi
posedas. Mi oferas al Vi ĉiujn farojn de la venanta tago. Mi volas ilin fari
por via honoro kaj por la savo de mia animo. Mi firme intencas kristane
travivi ĉi tiun tagon, ne ofendi Vin, mian amoplenan Patron, kaj bone
plenumi ĉiujn miajn devojn. Kompatema Dio, donu al mi la gracon por fidele
efektivigi ĉi tiun intencon.
(al la idekso)
15 Vespera preĝo
Mi Vin adoras, mia Dio, kaj kore Vin amas. Vi kreis min, Vi konservis min
ĝis tiu ĉi tago, kaj mi dankas Vin. Donu al mi gracon, por koni miajn
kulpojn kaj ilin abomeni.
Ĉi tie
oni faru la ekzamenon de la konscienco kaj poste:
Mia Dio, mi scias, ke mi estas pekulo kaj multe ofendis Vin. Sed mi petas de
Vi pardonon, kaj kore promesas al Vi malami la pekon kaj ami Vin. Pardonu,
ho mia Dio, pardonu. Mi ne estas inda esti nomata via ido, ĉar miaj pekoj
malĝojigis vian bonegan koron. Pro la meritoj de via tre amata Filo Jesuo,
kiu mortis sur la kruco pro mia savo, mi sincere proponas, neniam
mortomerite peki en la estonta tempo kaj fari sinceran penton.
Jesuo, Maria, Jozefo, mi donas al vi mian koron kaj animon. Jesuo, Maria,
Jozefo, prizorgu min en la morta horo. Jesuo, Maria, Jozefo, pace elspiru
animo mia en via societo.
La animoj de la mortintoj pro la kompato de Dio ripozu en paco. Amen.
(al la idekso)
16 Sinkonsekro de esperantistoj al Virgulino Maria
Ni petas Vin, Virgulino Maria, Patrino de la Eklezio, Patrino de la bona
konsilo, estu nia Perantino ĉe via kaj Dia Filo kaj konduku nin al Li. Ĉiam
al ni montradu, kiel ni devas vivi kaj servi al homoj kaj al homaro en ĉiu
nacio, kiel ĉiujn gvidi laŭ vojo de Spirito, kiel garantii en la mondo
justecon kaj pacon.
Tial ni al Vi hodiaŭ konsekras nin kaj ankaŭ la tutan nian kaj tutmondan
Esperantan movadon kun ĉiuj ĝiaj taskoj kaj en senlima fido ni metas ĝin en
viajn patrinajn manojn. Amen.
(al la idekso)
17 Konsekro al la Senmakula Koro de Virgulino Maria
Ho, Virgulino Maria el Fatima, Patrino korfavora, Reĝino de ĉielo kaj de
tero, Azilo de pekuloj, ni aliĝas al la Maria-movado de sacerdotoj kaj
konsekras nin laŭ tute speciala maniero al via Senmakula Koro.
Per ĉi konsekro ni volas kun Vi kaj helpe de Vi plenumadi ĉiujn votojn,
kiujn ni akceptis per nia bapta konsekro.
Ni promesligas nin ankaŭ por strebi pri interna konverto, tre postulata en
Evangelio, kiu nin liberigos de ĉiu inklino al ni mem kaj al facilaj
kompromisoj kun la mondo; ni estu kiel Vi komplezaj senĉese plenumadi nur la
volon de la Patro.
La plej dolĉa kaj kompatema Patrino, ni konfidas al Vi nian personon kaj
nian kristanan vokitecon: disponu pri ĝi laŭ viaj planoj de la savo en ĉi
decida horo, tiom peze premanta la mondon. Ni volas vivi nian vokitecon laŭ
viaj deziroj, precipe en la renovigita spirito de la preĝo kaj pento, en
fervora partopreno je festado de Eŭkaristio kaj je apostolado, per ĉiutaga
preĝado de Rozario kaj per simpla vivmaniero konforme al Evangelio; ni estu
bona ekzemplo por obeado de Dia leĝo kaj en praktikado de kristanaj virtoj,
precipe de pureco.
Ni promesas al Vi ankaŭ, ke ni estos kunigitaj kun la Sankta Patro, kun la
hierarkio kaj kun niaj pastroj, por tiel konstrui remparon kontraŭ la
progresanta batalo, detruonta la instrutaskojn de la Eklezio, batalo,
minacanta la bazon de la Eklezio.
Sub via protekto ni volas esti apostoloj de tiom bezonata unueco kun la Papo
en preĝado kaj amo kaj ni petegas Vin pri speciala protekto por li.
Fine ni promesas al Vi, ke ni la animojn, kiujn ni renkontos, laŭeble
kondukados al renovigo de sindonemo al Vi.
Ni konscias, ke ateismo kaŭzis ĉe granda nombro da kredintoj katastrofon en
la kredo, ke malsanktigo penetris en la sanktan preĝejon Dian, ke malbono
kaj pekoj senĉese pli en la mondo disvastiĝas. Tial ni kuraĝas, Patrino de
Jesuo kaj mizerikorda kaj potenca Patrino nia, fide levi niajn okulojn al Vi
kaj ankoraŭ hodiaŭ peti kaj atendi de Vi perigon de la savo por ĉiuj viaj
infanoj, ho kompatema, ho afabla, ho dolĉega Virgulino Maria. Amen.
(al la idekso)
18 La beno
La Sinjoro vin benu kaj vin gardu. Li montru al vi sian vizaĝon kaj havu
mizerikordon al vi. Li turnu al vi sian rigardon kaj donu al vi la pacon.
La Sinjoro vin benu en la nomo de la Patro kaj de la Filo kaj de la Sankta
Spirito. Amen.
(al la idekso)
19 La Anĝeluso
S. La anĝelo de la Sinjoro anoncis al Maria,
K. kaj Ŝi koncipis de la Sankta Spirito.
S.K. Saluton, Maria, gracoplena, la Sinjoro estas kun Vi. Benata Vi
estas inter la virinoj kaj benata estas la frukto de via sino, Jesuo. Sankta
Maria, Dipatrino, preĝu por ni pekuloj, nun kaj en la horo de nia morto.
Amen.
S. Jen, mi estas la servantino de la Sinjoro,
K. fariĝu al mi laŭ via parolo.
S.K. Saluton, Maria, gracoplena ...
S. Kaj la Vorto fariĝis karno
K. kaj loĝis inter ni.
S.K. Saluton, Maria, gracoplena ...
S. Preĝu por ni, sankta Dipatrino,
K. por ke ni fariĝu indaj je promesoj de Kristo.
S. Ni preĝu: Enverŝu, ni petas, ho Sinjoro, vian gracon en nian
animon. Per la anĝela anonco ni ekkonis la enkarniĝon de Kristo, via Filo.
Per lia pasiono kaj kruco ni estu gvidataj al la gloro de la reviviĝo. Per
Kristo, nia Sinjoro.
K: Amen.
(al la idekso)
20 Preĝo de Sankta Bernardo
Memoru, ho plej pia Virgulino Maria, ke oni ne aŭdis dum jarcentoj, ke Vi
forlasis tiun, kiu serĉis vian protekton, alvokis vian helpon kaj petis vian
subtenon. De tiu fido kuraĝigita, mi kuras al Vi, ho Virgulino de virgulinoj
kaj Patrino, mi venas al Vi, mi ĝemanta pekulo staras antaŭ Vi. Ho Patrino
de la Vorto, bonvolu ne malŝati miajn vortojn, sed aŭdu ilin favore kaj
elaŭdu. Amen.
(al la idekso)
21 Por la Papo
Ĉiopova, eterna Dio, kompatu al via servanto, nia Papa Moŝto (Johano Paŭlo
la Dua), kaj laŭ via mildeco gvidu lin sur la vojo de la eterna savo, por
ke, per via helpo, li deziru tion, kio plaĉas al Vi, kaj per ĉiuj fortoj li
tion efektivigu. Per Kristo, nia Sinjoro. Amen.
(al la idekso)
22 Por la paco kaj justeco
Donu pacon, ho Sinjoro, al tiuj, kiuj esperas al Vi. Aŭskultu niajn preĝojn
kaj direktu nin laŭ la vojo de la justeco.
Ho Sinjoro, kiu malkaŝis al ni, ke la pacigantoj estos nomataj viaj filoj, ebligu, ke ni starigu tiun justecon, kiu sola kapablas certigi firman kaj veran pacon. Per nia Sinjoro
Jesuo Kristo, via Filo, kiu vivas kaj regas kun Vi en unueco kun la Sankta
Spirito, Dio en ĉiuj jarcentoj.
(al la idekso)
